كيف يشتغل المانشيت
تضيف دوريك مرة وحدة، والمانشيت يسوّي الباقي: يجيب أرقام دوريك من الفانتازي، ويبني تقرير لكل جولة وشهر وموسم، جاهز تنزّله وترسله للقروب.
من التسجيل لأول تقرير
سوّ حسابك
الحساب لك أنت بس كصاحب الدوري. أعضاء دوريك ما يسجّلون ولا يحمّلون شي، يفتحون التقارير من الرابط على طول.
أضف دوريك
الصق رابط دوريك من موقع الفانتازي، أو اكتب رقمه. يشتغل مع فانتازي البريميرليغ وفانتازي دوري روشن. ونعرض لك اسم الدوري وعدد المتنافسين عشان تتأكد إنه دوريك قبل ما ينضاف شي.
الدوريات الكلاسيكية (Classic) بس، وبحد أقصى ١٠٠ متنافس.
وين ألقى رابط دوريك؟
- افتح موقع الفانتازي وسجّل دخولك: fantasy.premierleague.com للبريميرليغ، أو fantasy.spl.com.sa لروشن.
- من القائمة اضغط "Leagues"، وبعدها اختر دوريك من "Leagues & Cups".
- انسخ الرابط كامل من شريط العنوان. رقم الدوري يجي بعد leagues/.
نبني تقاريرك
نجيب أرقام كل جولة لعبها دوريك هالموسم ونبني تقاريرها. تشوف شريط التقدّم يمشي، وخلال ثواني تفتح التقارير.
شاركها بالقروب
كل تقرير تنزّله صورة جاهزة للقروب، أو تشاركه من جوالك مباشرة. وتقدر ترسل رابط التقرير، ويفتح لأي أحد بدون تسجيل دخول.
وبعدها؟ كل جولة لحالها
ما تحتاج تسوّي شي ثاني. كل ما تخلص جولة، ينبني تقريرها لحاله.
الفانتازي يثبّت نقاط الجولة الساعة ٩ الصبح بتوقيت بريطانيا، في اليوم اللي بعد آخر مباراة. وتقرير الجولة ينزل في نفس الوقت: ١١ الصبح بتوقيت السعودية، وتصير ١٢ الظهر بعد ما تحوّل بريطانيا للتوقيت الشتوي آخر أكتوبر.
ليش ننتظر؟ لأن نقاط البونص تتغيّر لين يثبّتها الفانتازي، ونبي أرقام التقرير تكون نهائية من أول مرة تشوفها.
- آخر مباراة السبت ← التقرير صباح الأحد
- آخر مباراة الأحد ← التقرير صباح الاثنين
- آخر مباراة الاثنين ← التقرير صباح الثلاثاء
ثلاث تقارير
تقرير الجولة
نجم الجولة، أفضل وأسوأ كابتن، أفضل صفقة، الذيب، ملك الدكة، وترتيب الدوري.
تقرير الشهر
مدير الشهر، الفورمة، وسباق اللقب. ويكمل مع كل جولة تخلص في الشهر.
تقرير الموسم
البطل، مدير كل شهر، وشرف الموسم.
خلّه على ذوقك
كلها اختيارية، وما يشوف هالإعدادات غيرك أنت كصاحب الدوري.
أسماء المتنافسين
سمّ كل واحد بالاسم اللي تعرفونه فيه، بالعربي والإنجليزي، ويطلع كذا في كل التقارير.
حسابي ← إدارة
شكل التقارير
ستة أشكال، منها كلاسيك وجريدة ونيون وروشن. تختار الشكل اللي تنفتح فيه تقارير دوريك، وكل واحد يقدر يغيّره عنده.
حسابي ← شكل المشاركة
التعليق
تعليق مكتوب على أحداث الجولة بثلاث نبرات: خفيف، متوسط، لاذع. وتعدّل أي سطر قبل ما تنشره. والتقرير ينشر بدونه إلا إذا شغّلته.
زر «محرّر التعليقات» فوق التقرير
الاشتراك
أول جولة مجاناً
الجولة اللي تضيف فيها دوريك، وكل الجولات اللي قبلها، مجانية. وبدون بطاقة دفع.
اشتراك واحد للدوري كله
تدفع أنت كصاحب الدوري، وتنفتح التقارير لكل أعضاء دوريك.
تشترك من حسابك
في صفحة «حسابي»، كل دوري جنبه زر «اشترك». والباقات بالجولات: ١٠ جولات، ٢٠ جولة، أو باقي الموسم.
ما يتجدد لحاله
تدفع مقدماً، وما ينخصم منك شي إلا إذا جدّدت بنفسك. ولو ما جدّدت، تقاريرك القديمة تظل مفتوحة، والجولات الجديدة بس تتقفل.