الأسئلة الشائعة
أجوبة مختصرة لأكثر ما يسأل عنه أصحاب الدوريات. وأي سؤال ثاني، راسلنا على Saleh@fplmanshet.com.
متى يطلع تقرير الجولة؟
الفانتازي يثبّت نقاط الجولة نهائياً الساعة ٩ صباحاً بتوقيت بريطانيا في اليوم التالي لآخر مباراة في الجولة — يعني ١١ صباحاً بتوقيتنا، وتصير ١٢ ظهراً بعد ما تحوّل بريطانيا للتوقيت الشتوي أواخر أكتوبر. والمانشيت ينشر التقرير بعدها مباشرة، خلال ساعة على الأكثر.
فالوقت ثابت، بس اليوم يتغيّر حسب جدول المباريات:
- آخر مباراة السبت ← التقرير صباح الأحد
- آخر مباراة الأحد ← التقرير صباح الاثنين
- آخر مباراة الاثنين ← التقرير صباح الثلاثاء
ليش ما ينشر التقرير فور ما تنتهي آخر مباراة؟
لأن نقاط البونص والنقاط النهائية تظل «مبدئية» عند الفانتازي إلى أن تُقفل الجولة، وتتغيّر فعلاً. ولو نشرنا قبل الإقفال، يمكن يطلع أفضل كابتن أو صاحب أعلى جولة شخص، وبعدها تتغير الأرقام ويطلع شخص ثاني. فالمانشيت ينتظر التثبيت عشان تكون أرقام التقرير نهائية من أول مرة.
وللعلم، الفانتازي غيّر هذا الموعد في موسم ٢٠٢٦/٢٧: كان قبل بساعة واحدة بعد آخر مباراة، وصار الحين صباح اليوم اللي بعده. فالتقارير تنزل متأخرة شوي عن الموسم الماضي، وهذا طبيعي مو خلل.
كم يكلف الاشتراك؟
أول جولة لدوريك في المانشيت مجانية بالكامل، مهما كان وقت انضمامك، وبدون بطاقة دفع وبدون التزام. وبعدها فيه ثلاث باقات مدفوعة مقدماً، وكلها محسوبة بالجولات:
- ١٠ جولات — ١٥ ريال
- نص الموسم، حتى نهاية الجولة ٢٠ — ٢٠ ريال
- الموسم كامل — ٣٠ ريال
هل الاشتراك يتجدد تلقائياً؟
لا. كل باقة مدفوعة مقدماً وتنتهي وحدها لما تخلص جولاتها، وما ينخصم من بطاقتك أي مبلغ إلا باختيارك أنت في كل مرة. فما فيه اشتراك تحتاج تلغيه أصلاً.
وإذا جدّدت قبل ما تنتهي باقتك الحالية، الجولات الجديدة تنضاف على اللي باقي منها مو تلغيه — فما تخسر وقت دفعت مقابله.
لازم أعضاء دوريي يسوّون حسابات؟
لا. التقارير مفتوحة لأي شخص معه الرابط، فتقدر ترسله في قروب الدوري ويقرأه الكل بدون تسجيل دخول وبدون تحميل أي شيء. أنت وحدك كمالك الدوري تحتاج حساب — عشان تضيف الدوري وتعدّل إعداداته وتشترك.
أي دوريات أقدر أضيفها؟
الدوريات المصغّرة (Classic) من فانتازي البريميرليغ ومن فانتازي دوري روشن السعودي. الصق رابط دوريك أو اكتب رقمه، والمانشيت يعرض لك اسم الدوري وعدد المتنافسين عشان تتأكد قبل ما ينضاف شيء. والحد الأقصى ١٠٠ متنافس في الدوري.
وش يصير لتقاريري إذا ما جدّدت؟
ما ينحذف شيء وما ينقفل دوريك. كل التقارير حتى آخر جولة غطّتها باقتك تظل شغالة، وكل رابط سبق وشاركته يظل يفتح عادي. الجولات الأحدث بس هي اللي تتقفل لين تجدّد.